من طرف wesa الثلاثاء ديسمبر 28, 2010 12:34 am
الطحينة السائلة المنزلية الصنع وأسرار نجاحها
النهارده جيبالكم وصفة هى بديل لمنتج موجود فى السوق وبنستخدمة كتير فى أطباقنا وهو الطحينه
أنا بعشق الطحينه جداً جداً وبدخلها فى كتير من الوصفات وبحب السلطات اللى داخل فيها الطحينه
زى الحمص وبابا غنوج وغيره وغيره
بحب الطحينه المصريه اللى بتصنع فى معامل تسمى ب (السرجه)
ودى معامل صغيره يصنع فيها المفتقه والطرشى والطحينه وخلافه
الطحينه السائله
المقادير بسيطه جداً جداً
الطريقه سهله لو التزمنا بها
المقادير
3 اكواب سمسم غير محمص
(ودى تكه مهمه أوووووووووووووووووووى)
كوب وربع طحين أبيض
كوب وربع زيت ذره
الطريقه
اهم شئ السمسم يكون نى وغير محمص وبلاش نستسهل ونجيبه محمص جاهز
لييييييييييييييييييييييييييييييييييييييييييييييييي ييييه؟؟؟؟؟
علشان عند التحميص حتلاحظى وجود لمعه فى السمسم ولو مسكناه بطرف الاصابع
حتلاحظى ان السمسم فيه ماده دهنيه وده زيت السمسم اللى كله فوائد كتير كتير لكن لو اشتريناه متحمص جاهز حيكون فقد الماده الدهنيه دى
نضع السمسم فى حله ونحمصه بس بلاش يتحمص ويكون غامق خلى لونه فاتح يعنى حوالى 10 دقائق على نار عاليه وتقليب مستمر
نتركة يهدأ وبعد كده نطحنه فى المطحنه او الكبة
نضيف الدقيق عليه هكذا
ونرجع تانى نطحن الخليط فى الكبه ليمتزجوا معاُ
ننزل بنصف كميه الزيت بهدوء مع التقليب بالمضرب اليدوى وممكن مضرب البيض الكهربائى بس يكون على اقل سرعه
نقلب بسرعه فائقه الى ان يتشرب الخليط من الزيت
نضيف باقى الكميه مع الاستمرار فى التقليب
حتجدى الخليط كالسائل ولكن متماسك
ضعيه فى برطمان نضيف وجاف فى التلاجه
ودى حتبقى طحينه مركزه زيها زى اللى بنشتريها جاهزه
نفس الطعم ويمكن أحلى وأجمل وأطعم وكمان انضف وأرخص وأضمن
وعند الاستخدام طلعى جزء فى طبق وخففيه وضعى اضافاتك وتوابلك لتحصلى على أحلى سلطه طحينه
وبالهنا والشفا
